#ໃນຕອນເຊົ້າ ຂອງວັນທີ 12 ທັນວາ 2024 ພະແນກເຕັກໂນໂລຊີ ແລະ ການສື່ສານ ແຂວງອັດຕະປື ໄດ້ຈັດກອງປະຊຸມ ສະຫຼູບ-ຖອດຖອນບົດຮຽນ ປະຈໍາປີ 2024 ແລະ ສ້າງແຜນ ປີ 2025, ແລະ ເຜີຍແຜ່ນິຕິກໍາດ້ານໄປສະນີ, ໃຫ້ກັບບັນດາບໍລິສັດໄປສະນີ ທັງພາກລັດ ແລະ ເອກະຊົນສາຂາແຂວງອັດຕະປື, ໂດຍການເປັນປະທານຂອງທ່ານ ຂັນທອງ ຍິ້ນດາວົງ ເລຂາຄະນະພັກຮາກຖານ ຫົວໜ້າພະແນກ ຕສ ແຂວງ, ມີທ່ານຮອງຫົວໜ້າພະແນກ, ຫົວໜ້າຂະແໜງ, ຮອງຂະແໜງ ພ້ອມດ້ວຍວິຊາການ ຈາກພະແນກ ຕສ ແຂວງ ແລະ ພາກສ່ວນບໍລິສັດ ໄປສະນີລາວ ແລະ ບັນດາບໍລິສັດໄປສະນີເອກະຊົນ ເຂົ້າຮ່ວມທັງໝົດຈໍານວນ 13 ທ່ານ, ຍິງ 04 ທ່ານ.

ຈຸດປະສົງຂອງກອງປະຊຸມ ແມ່ນສະຫຼູບ-ຖອດຖອນບົດຮຽນ ປະຈໍາປີ ແລະ ເຜີຍແຜ່ນິຕິກໍາດ້ານໄປສະນີ ໃຫ້ບັນດາບໍລິສັດທີ່ໃຫ້ການບໍລິການດ້ານໄປສະນີໄດ້ຮັບຮູ້ເຂົ້າໃຈຢ່າງເລິກເຊິ່ງ ໃນການດໍາເນີນທຸລະກິດ ໃຫ້ມີປະສິດທິພາບ ຖືກຕ້ອງຕາມລະບຽບກົດໝາຍທີ່ກໍານົດໄວ້ໃນແຕ່ລະໄລຍະ ເຊິ່ງເອກະສານທີ່ນໍາມາເຜີຍແຜ່ມີຄື: ຂໍ້ຕົກລົງວ່າດ້ວຍການອະນຸຍາດດໍາເນີນທຸລະກິດດ້ານໄປສະນີ, ຂໍ້ຕົກລົງວ່າດ້ວຍມາດຕະການປັບໄໝວຽກໄປສະນີ, ກອງປະຊຸມໄດ້ແລກປ່ຽນ ຄໍາຄິດຄໍາເຫັນ ແລະ ຖອດຖອນບົດຮຽນ ເຊິ່ງກັນ ແລະ ກັນ ລະຫວ່າງ ພະນັກງານພະແນກ ຕສ ແຂວງ ກັບພາກສ່ວນບໍລິສັດໄປສະນີ ດ້ວຍບັນຍາກາດທີ່ຟົດຟຶ້ນ.

ຈາກນັ້ນ, ກອງປະຊຸມໄດ້ຮັບຟັງການໂອ້ລົມຂອງຄະນະປະທານທີ່ໄດ້ຊີ້ນໍາວຽກງານໄປສະນີ ເຊິ່ງທ່ານໄດ້ຍົກໃຫ້ເຫັນເຖິງຫຼາຍບັນຫາທີ່ສໍາຄັນໃນການເຮັດໜ້າທີ່ວຽກງານຄຸ້ມຄອງ ບັນດາບໍລິສັດໄປສະນີ ແລະ ໄດ້ຊຸກຍູ້ສົ່ງເສີມບັນດາບໍລິສັດ ເອົາໃຈໃສ່ຂະຫຍາຍຕາໜ່າງໄປສະນີໄປໃຫ້ທົ່ວເຖິງ, ພ້ອມເຮັດໜ້າທີ່ການບໍລິການຮັບໃຊ້ສັງຄົມດ້ວຍຄວາມບໍລິສຸດ, ໂປ່ງໃສ,ໃຫ້ຄວາມຮ່ວມມືໃນການປະຕິບັດໜ້າທີ່ວິຊາສະເພາະຂອງພະນັກງານ, ເອົາໃຈໃສ່ສະໜອງຂໍ້ມູນດ້ານຕ່າງໆໃຫ້ເປັນປົກກະຕິ, ເປັນເຈົ້າການປະຕິບັດລະບຽບກົດໝາຍ ແລະ ຊໍາລະຄ່າທໍານຽມ-ຄ່າບໍລິການຢ່າງຄົບຖ້ວນ, ພ້ອມນັ້ນ ທ່ານຍັງໄດ້ ເນັ້ນໜັກເລື້ອງການເອົາໃຈໃສ່ຕິດຕາມເຄື່ອງຝາກທີ່ຜິດໝາຍ ແລະ ບັນຫາອື່ນໆທີ່ເປັນບັນຫາພົ້ນເດັ່ນທີ່ເກີດຂຶ້ນໃນສັງຄົມຕໍ່ກັບວຽກງານໄປສະນີພາຍໃນແຂວງ.